Xidmət əməkdaşları BQXK tərəfindən təşkil olunmuş təlimlərdə iştirak etmişlər.
13-08-2022, 11:06 | 473 dəfə oxunub
Ədliyyə Nazirliyi və Beynəlxalq Qırmızı Xaç Komitəsi arasında əməkdaşlıq çərçivəsində məhkumların hüquq və azadlıqlarının təminatı, qanunvericilik bazasının yenilənməsi, Penitensiar xidmətin fəaliyyətinin təkmilləşdirilməsi, kadr korpusunun bilik və bacarıqlarının artırılması məqsədilə qarşılıqlı fəaliyyət uğurla davam etdirilməkdədir.
Penitensiar və probasiya sahələrində işləyən təlimçilərin interaktiv tədris bacarıqlarının və metodologiyalarının təkmilləşdirilməsi məqsədi daşıyan növbəti təlimlər 3-4 və 9-12 avqust tarixlərində BQXK-nın Azərbaycan Nümayəndəliyi tərəfindən Ədliyyə Nazirliyinin Penitensiar və Probasiya xidmətlərinin, Ombudsman Aparatının əməkdaşlarından ibarət qruplar üçün təşkil edilmişdir.
Penitensiar xidmətin Baş idarəsinin, Təlim mərkəzinin və cəzaçəkmə müəssisələrinin əməkdaşlarının iştirak etdiyi təlimlərdə Beynəlxalq Qırmızı Xaç Komitəsinin ölkəmizdəki fəaliyyəti barədə məlumat verilmiş, təlimlərin aparılması və təşkili qaydaları barədə mühazirələr oxunmuş, tapşırıqlar icra edilmiş və müzakirələr aparılmışdır.
