25.08.2022-ci il tarixdə Ədliyyə Nazirliyi Penitensiar Xidmətinin Mühafizə alayında həqiqi hərbi xidmətə çağırılmış gənc əsgərlərin hərbi andiçmə mərasimi keçirilmişdir.
Azərbaycan Respublikasının dövlət himni səsləndirildikdən sonra dövlət bayrağı hərbi marşın sədaları altında təntənəli surətdə meydanın mərkəzinə gətirilmişdir. Sonra gənc əsgərlər Vətənə, xalqa və dövlətə sədaqət andı içmişlər.
Mühafizə alayının komandiri ədliyyə polkovnik-leytenantı Rauf Əsədov tədbirdə çıxış edərək gənc əsgərlərə Ədliyyə nazirinin müavini - Penitensiar Xidmətin rəisi, ədliyyə general-leytenantı Ceyhun Həsənovun təbriklərini çatdırmış, gənc əsgərlərə Vətənə şərəf və ləyaqətlə xidmət etməyi, komandirlərin əmr və tapşırıqlarını sözsüz yerinə yetirməyi, ölkəmizin müdafiəsinə qalxmağa hər an hazır olmağı tövsiyə etmişdir.
Daha sonra şəxsi heyətin hərbi marş sədaları altında təntənəli marşla keçidi olmuşdur.
Sonda Mühafizə alayının Xüsusi təyinatlı dəstəsi nümunəvi çıxışlarla fiziki və döyüş hazırlığını nümayiş etdirmişdir.
