Ədliyyə Nazirliyi Penitensiar Xidməti ilə Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komisiyyası arasında 2023-cü il üçün təsdiq edilmiş birgə tədbirlər planı çərçivəsində məhkumlarla tərbiyəvi və maarifləndirici işlərin həyata keçirilməsi istiqamətində tədbirlər davam etdirilir.
Dövlət Komisiyyasının İşçi qrupunun məhkumlarla növbəti görüşü 22.02.2023-cü il tarixdə 2 və 17 saylı cəzaçəkmə müəssisələrində keçirilmişdir.
Görüşdə Ədliyyə Nazirliyi Penitensiar xidmətinin, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komisiyyasının, Daxili İşlər Nazirliyinin Baş Narkotiklərlə Mübarizə İdarəsinin, Əmək və Əhalinin Sosial Müdafiəsi Nazirliyinin və Bakı şəhər narkoloji mərkəzinin məsul əməkdaşları iştirak etmişlər.
“Narkotik vasitələrin, həmçinin narkomanlığın insanların sağlamlığına, insan orqanizminə məhvedici təsiri və cəmiyyətə ziyanı” mövzusunda keçirilmiş seminar-treninqlərdə məhkum edilmiş şəxslərə narkomaniyanın doğurduğu faciələr, törətdiyi sosial fəsadlar, xəstəliklərin yayılması yolları, eləcə də narkomaniya ilə mübarizədə dövlətin rolu haqqında məlumatlar verilmişdir.
Daha sonra məhkumlarla geniş diskussiya aparılmış, onları maraqlandıran suallar cavablandırılmışdır.
