Məhkumlarla narkotiklərlə mübarizə mövzusunda növbəti görüş keçirilib
28-08-2023, 12:43 | 883 dəfə oxunub
Ədliyyə Nazirliyi Penitensiar Xidməti ilə Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası arasında 2023-cü il üçün təsdiq edilmiş birgə tədbirlər planı çərçivəsində məhkumlarla tərbiyəvi və maarifləndirici işlərin həyata keçirilməsi istiqamətində tədbirlər davam etdirilir.
Dövlət Komissiyasının İşçi qrupunun məhkumlarla növbəti görüşü 1 və 7 saylı cəzaçəkmə müəssisələrində keçirilib.
Görüşdə Ədliyyə Nazirliyi Penitensiar xidmətinin, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının, Daxili İşlər Nazirliyinin Baş Narkotiklərlə Mübarizə İdarəsinin, Əmək və Əhalinin Sosial Müdafiəsi Nazirliyinin, Ailə, Qadın və Uşaq Problemləri üzrə Dövlət Komitəsinin və Bakı şəhəri Narkoloji Mərkəzinin məsul əməkdaşları iştirak edib.
“Narkotik vasitələrin, həmçinin narkomanlığın insanların sağlamlığına, insan orqanizminə məhvedici təsiri və cəmiyyətə ziyanı” mövzusunda keçirilmiş seminar-treninqlərdə məhkum edilmiş şəxslərə narkomaniyanın doğurduğu faciələr, QİÇS və bir sıra başqa xəstəliklərin yayılması yolları haqqında məlumatlar verilib.
Daha sonra məhkumlarla geniş diskussiya aparılıb, onları maraqlandıran suallar cavablandırılıb.
